Sjá þetta

Sjálfskipaðir íhaldsmenn með bros á vör henda 2 milljörðum af peningum Varðhunda frelsisins í enn eitt orlofshúsið fyrir gamalt fólk. Ekki virðast menn skilja þetta. Ef aldraðir hafa áhuga á að búa á svona heimili vinna þeir bara, fjárfesta í hlutafélögum eða spara sér einfaldlega pening til efri áranna og kaupa íbúð/herbergi sem djarft einkafyrirtæki hefur reist og haldið utan um. Að sjálfsögðu á það að ganga þannig fyrir sig.

Þannig er það bara. 

Fyrsta skóflustungan tekin að nýju hjúkrunarheimili

Vinstrislagsíða amerískra fjölmiðla bersýnileg

Varðhundar frelsisins voru miklir aðdáendur Önnu Nichole Smith. Ógleymanleg túlkun hennar á Tanyu Peters í "Beint á ská 33 1/3" gleymist seint, sem og stormasamt líferni hennar á síðustu árum og áratug. Í ljósi þessa er hryggilegt að velta fyrir sér hvernig vinstrisinnaðir amerískir fjölmiðlar hafa látið fregnir af andláti hennar afskiptar að miklu leyti (að minnsta kosti í hlutfalli við mikilvægi) og kjósa að dvelja fremur við ótrúverðugar meiningar vinstrimanna um farsæla frelsun írösku þjóðarinnar, svo dæmi sé tekið.

Er erfitt að gera sér í hugarlund hvers vegna skelfilegur dauðdagi Önnu hefur ekki vakið meiri athygli vestanhafs, en óneitanlega læðist sá grunur að varðhundunum að öfundsýki vegna ríkidæmis hennar hafi haft áhrif á fréttaflutninginn. Það er enda alþekkt hjá fjölmiðlamönnum að þeir dragi taum sósíalískrar sameignarhugsjónar og virði að vettugi einstaklinga sem komist hafa til metorða á eigin verðleikum.

Svei sé hinni vinstrisinnuðu pressu í Ameríku!

Fréttastofur gagnrýndar fyrir slælega umfjöllun um andlát Önnu Nicole

Hvers vegna fer sjálfsafla fé okkar í þetta reglugerðar- og ríkisbákn?

Eins og lesendum síðunnar ætti að vera vel kunnugt um misbýður varðhundum frelsisins að sjálfsaflafé þeirra sé notað til að þenja út báknið, með tilheyrandi bruðli í sósíalískar atvinnubótastofnanir. Vísitala framleiðsluverðs er gott dæmi um þessa fönísku hneigð ríkisapparatsins, sem býr til gerviþarfir til að iðjulausir ríkisstarfsmenn geti sagst vera í vinnu. Þetta snýst allt um hvata, eins og við öllum vitum, og ríkishvatinn er ekki til. Hefur þú lesandi góður annars einhverntímann heyrt um einhvern sem hagnýtir sér þessa svokölluðu "vísitölu"? Einkaaðilar eru fullfærir um að búa til sína eigin indikatora, sem þeir geta brúkað að eigin vild og selt til þeirra sem telja sig þurfa slíkt.  

Annars flæðir póstur inn á rafrænt gólf varðhundanna ([e-mail]) eftir að síðan opnaði. Langflest skeytin hafa verið á jákvæðu nótunum, þar sem okkur er fagnað sem boðberum hinnar sönnu frjálshyggju, sem íslenskir íhaldsmenn hafa skrumskælt í gegnum árin. Við þökkum fyrir skeytin, en frábiðjum blóm og sjónvarpsviðtöl í bili.

Til hinna varðhundanna (varðhunda sykurhúðaða sósíalistaflokksins) höfum við einungis þetta að segja: Skammist ykkar! Þið hafið látið hunangsljúfa röddu Flokksins umbreyta ykkur í alræðissinnaða íhaldsmenn, sem skeyta engu um frelsi einstaklingsins til orða og athafna. Með ítrekuðum póstsendingum hafið þið afhjúpað villu ykkar vegar og hvetjum við, varðhundar frelsisins, ykkur eindregið til að hugleiða orð ykkar og gjörðir. Í Ritningunni, sem þið hafið greinilega týnt fyrir löngu, segir: ,,Sjá, frelsaðu markaðinn og fólkið verður frjálst".

Skammist ykkar fyrir úrtölurnar, Varðhundar frelsisins munu hér eftir sem hingað til berjast, berjast, berjast fyrir hugsjóninni.

Vísitala framleiðsluverðs hækkar

Okkar maður!

Varðhundar frelsisins hvetja alla frelsisunnendur til að sækja hádegisfund hjá sameignarhreyfingunni Ungum Jafnaðarmönnum á Sólon á morgun. Þar mun skelfir sósíalistanna, Sigríður okkar Andersen, tala af myndugleik um „jafnréttismál“.

Ekki verður erfitt fyrir hana Andersen okkar að reka þvæluna um „launamun kynjanna“ og „kynbundið ofbeldi“ ofan í femínasistana.

Seilast í vasa minn

Alveg ótrúleg græðgin í þessum kennurum. Vilja seilast í vasa hins almenna skattborgara, þó þeir fitni nú þegar eins og púkinn á fjósabitanum af almannafé. Varðhundar frelsisins eru ekki par snortnir.

Smá ríkisútgjöld eru alltaf of mikil ríkisútgjöld.

Þannig er nú það bara. 

Kennarar mótmæla launum sínum

Vilja sósíalískir kverúlantar að ríkið dæmi knattspyrnuleiki?

Þvílík ósvinna! Fjáraustur hins sósíalíska dómskerfis á sér engin takmörk. Settur saksóknari eyðir sjálfsaflafé borgaranna ótæpilega í einkamáli ríkisstjórnarinnar gegn alþýðumanninum Jóni Ásgeiri. Dómarar sama yfirvalds taka þátt í darraðardansinum og ganga síðan það langt að víkja hinum geðþekka Jóni Gerald úr "réttarsal" með þeim rökum að "dómarinn ráði". Sjaldan hefur kúgun ríkisvaldsins birst sótsvörtum almúganum jafn grímulaust.

Það hefur verið bjargföst skoðun Varðhunda frelsisins að einkavæða bera dómskerfið í heild sinni og losa almenning þannig undan oki hins opinbera. Þannig gæti saksóknari vegið og metið hverju sinni hvort það væri réttlætanlegt út frá fjárhagslegum sjónarmiðum að sækja fram eða láta mál falla niður, en ekki láta óljósar hugmundir valdhafa um réttlæti ráða ferðinni. Ekki þarf síðan að fjölyrða um kosti þess að einkavæða dómaraembætti í íslenska dómskerfinu. Úrtölumenn geta til að mynda litið til íþrótta á borð við knattspyrnu, þar sem einkaaðilar sjá um dómgæslu við glæsilegan orðstír. Vilja sósíalískir kverúlantar kannski að ríkið dæmi knattspyrnuleiki?

Hið svokallaða Frjálshyggjufélag hefur haft linkindarlega afstöðu til málsins og hefur félagið ekki breytt stefnu sinni þrátt fyrir ítrekaðar tilraunir varðhundanna til að lagfæra þessa firru í stefnuskrá félagsins. Málfrelsi varðhundanna var þannig stórlega skert á síðasta aðalfundi félagsins þegar þeim var vísað á dyr eftir réttmætar og sjálfsagðar ábendingar um firrta stefnu félagsins. Það hefur enda komið á daginn að þetta kaffihúsafélag samanstendur af örgum sósíalistum í sauðagæru.

„Ekki verður deilt við dómarann"

Ekki hlutverk landlæknis

Meira bullið að skattpeningar Varðhunda frelsisins fari í svona óþarfa. Ef einkaaðilar sjá sér hag í því að greina klamydíu og taka saman fjölda tilfella, þá gera þeir það að sjálfsögðu. Við þurfum ekki eitthvað ríkisbákn til að segja okkur hvernig haga á okkar kynlífi og passa upp á smithættu. Og hananú.

Ekki er öll vitleysan eins. 

1.729 klamydíutilfelli greind á Íslandi árið 2006

Ekki treysta sósíalistunum

Bloggari nokkur og yfirlýstur íhaldsmaður, Hjörtur Guðmundsson að nafni, hæddist hér á Moggablogginu að okkur Varðhundum frelsisins og reyndi að væna okkur um að sigla undir fölsku flaggi.

Við viljum benda á að manninum, sem segist vera frelsiselskandi, er ekki treystandi. Í bloggfærslu frá 28. desember segir hann eftirfarandi:

Hvers vegna fjárfestir ríkið ekki bara í þeim [ýmsum tækjum] sjálft? Er það ekki á ábyrgð þess að sjúkrahúsin okkar og lögreglan séu búin bezta búnaði sem völ er á á hverjum tíma?

Jahá! Þarna hvetur hann til aukinna ríkisútgjalda! Á bloggi hans skrifar hann auk þess daglegar færslur um Samfylkinguna og birtir myndir af forystukonu hennar! Er þessum manni treystandi? Eða er hann sósíalisti í sauðagæru?

Ekki er öll vitleysan eins. 

Að verðmeta einstaklinga

Á sósíalkratísku vefriti ungra sjálfstæðismanna er prýðileg grein í dag um verðmat á einstaklingum og hvernig verðleggja megi framlag þeirra til lands og þjóðar. Varðhundar frelsisins fagna því að svo opinská grein skuli birtast á vefritinu um mikilvægi þess að verðleggja framlag einstaklinga til auðssköpunar með réttum hætti og verðleggja sjálfa einstaklingana í kjölfarið með hliðsjón af því. Þannig er til að mynda fjallað um að krónprinsessan Mary Donaldson sé 143 milljarða króna virði fyrir danska ríkið vegna jákvæðra áhrifa hennar á danska hagkerfið.

Íslenskir sósíalistar hefðu gott af því að velta því stundum fyrir sér að sumir einstaklingar eru einfaldlega verðmætari en aðrir einstaklingar. Ná þeir þeim árangri með því að leggja hart að sér og sýna af sér mikla elju og dugnað við að komast í fremstu röð. Þannig ættu íslenskir vinstrimenn að hætta að nöldra yfir því að t.d. bankastjórar stóru bankanna þriggja séu með nokkrar milljónir í laun á mánuði. Hversu oft hefur maður til dæmis ekki heyrt vinstrimenn hvá yfir því að bankastjórarnir séu með tvöhundruð föld laun á við venjulegan verkamann? Sannleikurinn er bara sá að bankastjórinn eru miklu verðmætari fyrir íslenskt samfélag þegar litið er til auðssköpunar. Með réttu ættu þeir sennilega að vera með miklu hærri tekjur.

Hinir ríkisstyrktu stjórnmálaflokkar skeyta hins vegar lítið um það. Sjálfsaflafé athafnamannsins er skert um tugi prósentna til að borga fyrir gæluverkefni pólitíkusanna og annan óþarfa. Þessa fjárhagslega ofbeldi verður að linna - tekjuskattinn þarf að afnema.

Já, ekki er öll vitleysan eins. 

Ríkisafskipti

Það hlýtur að vera skýlaus réttur (no pun intended) að mega menga eins og hann lystir, svo framarlega sem hann skaðar ekki aðra með menguninni. Munum frelsislögmálið:

Einstaklingur má sveifla hnefa sínum eins og hann vill svo framarlega sem hann lendir ekki á nefi annars manns.

Mig minnir að Mill hafi sagt þetta.

Hefur þessi bábilja um gróðurhúsaáhrif ekki fengið að lifa nógu lengi? Ef einstaklingur hefur hag af því að lifa í mengunarlausum heimi, þá mengar hann að sjálfsögðu ekki. Annars skaðar hann bara sjálfan sig. Sem væri vitleysa.

Ekki er öll vitleysan eins. 

Jónína: Munum standa við skuldbindingar okkar samkvæmt Kyoto-bókuninni