Stórgóð skemmtun

Bíórýnir Varðhunda frelsisins skellti sér á hina eðlu mynd Ghost Rider, með Nihcolas Cage, í gærkvöld. Hörkuspenna og glæsilegar tæknibrellur sem einungis er hægt að finna í draumasmiðjunni Hollywood, sterkasta vígi frelsisins í kvikmyndagerð (allavega eitthvað annað en Kvikmyndasjóður!). Ghost Rider fær fimm stjörnur, hiklaust.

Eftirminnileg er setning Johnny Blaze (snilldarlega leiknum af Cage) úr myndinni: „I'm the only one who can walk in both worlds. I'm Ghost Rider." Það gerist varla svalara en þetta.

Vill einhver banna áhugamálið þitt?

Enn slær sósíalistinn Tony Blair vindhögg.

Varðhundar frelsisins hafa alltaf talað fyrir auknu frelsi, sama á hvaða vettvangi það er. Nú vilja breskir sósíalistar stöðva ungt fólk í að kaupa sér skotvopn. Hvar endar þetta? Hverjum vilja þeir næst meina að kaupa sér vopn til að verja sig, nú eða einfaldlega sér til skemmtunar? Fullorðnum? Nei, hallóhalló.

Afskiptasemi stjórnmálamanna að áhugamálum almennings eru til háborinnar skammar. Engum kemur við hvað aðrir gera, svo lengi sem það skaðar ekki aðra. Sama hvort það er að skjóta úr byssum eða eitthvað annað.

Blair vill herða viðurlög við byssueign

Frelsið á ferð!

Víkið frá, víkið frá! Hér ekur frelsið um!

Varðhundar frelsisins fagna þessum góðu tölum. Aukin velmegun er forsenda þess að hvert og eitt einasta mannsbarn geti ekið frjálst um götur borgarinnar á einkabíl. Það næsta verður að sjálfsögðu markaðsvæðing vegakerfisins, sem mun stuðla að enn frekari umferð og ánægju borgarbúa. Ríkisstyrktar almenningssamgöngur eru þó enn frelsinu fjötur um fót. Hver hefur ekki lent í því að vera fastur fyrir aftan strætó í umferðinni? Ef Strætó bs. yrði einkavætt gætu allir átt lausafé til að fjárfesta í einkabíl.

Úrtölukommar og strætóplebbar mega vara sig. Frelsið hefur talað sínu máli! 

73% aka einir í bíl til vinnu eða skóla í Reykjavík

Löglegt samráð!

Varðhundar frelsisins koma ekki auga á þann glæp sem aðrir virðast sjá í framferði olíufélaganna. Mega menn ekki tala saman? Samráð er ekkert annað en samstarf á markaði. Markaðurinn hlýtur svo hreinlega að leysa það þegar olíuverð er orðið of hátt með sinni ósýnilegu hendi og veita nýja möguleika og tækifæri. Snjallir einkaaðilar hefðu til dæmis geta tekið sig til, stofnað olíufélag og boðið lægra verð og fengið öll viðskiptin frá landsmönnum. Gömlu olíufélögin hefðu þá orðið undir í samkeppninni og allir verið sáttir.

Markaðurinn leysir málið og allir græða.

Ker dæmt til að greiða 15 þúsund krónur í bætur

Moggabloggið falsar aðsóknartölur

Varðhundar frelsisins hafa áður gert að umtalsefni þá hræsni sem felst í gegndarlausum áróðri sósíalískra alræðissinna gegn þeirri frjálsu og skapandi atvinnugrein sem klámiðnaðurinn er. Það ber vitanlega að ítreka þann málflutning og harma jafnframt hvernig þessi Stígamótasamtök geysast fram á vígvöllinn og ráðast gegn saklausum einstaklingum.

Þetta einelti Stígamótasamtakanna er þó einungis barnaleikur við hliðina á gerræðislegri meðferð stjórnenda blog.is samfélagsins á Varðhundum frelsisins.  Ítrekað hefur ritstjórn varðhundanna orðið var við óeðlileg afskipti stjórnendanna af færslum sínum, makalausri hunsun síðunnar í yfirliti yfir "valin blogg" og "vinsæl blogg" á forsíðu blog.is samfélagsins, og síðast en ekki síst bíræfinni fölsun á aðsóknartölum á síðu varðhundanna.

Strax á fyrsta degi, þegar síðan fékk einungis tæplega 500 heimsóknir, fór ritstjórnarmeðlimi að gruna að eitthvað óeðlilegt væri á seyði og fengu af því tilefni óháðan aðila (Freedom Report dot com) til að taka út vinsældir síðunnar.

Og ekki stóð á niðurstöðunum. Samkvæmt tölum óháða aðilans skipta heimsóknir á síðuna þúsundum á dag og hafa raunar náð yfir 10.000 markið á einungis þrem dögum. Er þetta í hróplegu ósamræmi við falsanir hins sósíalíska moggabloggs, sem telur rétt um einn tíunda af rauntölunni.

Varðhundarnir munu þó ekki bugast við þetta mótlæti heldur beita sér af enn meiri krafti en áður til að hamra á ritningunni og þeim hugmyndafræðilega grunni sem farið hefur sigurför um gervalla veröld. Ótti sykurhúðaðra íhaldssósíalista styrkir okkur eingöngu í þeirri trú að málstaður okkur hreyfi við umræðunni og lyftir henni upp á nýtt og æðra plan. Megi málstaðurinn lengi lifa!

Stígamót skora á ráðamenn þjóðarinnar að koma í veg fyrir klámþing

Og hvað með það?

Daður formanns "Frjálshyggjufélagsins" við sósíalisma verður á stundum svo yfirþyrmandi að Varðhundar frelsisins gleyma stað og stund af bræði. Í pistli þriðjudagsins sjá lesendur þó glögglega að hin hreina hugsjón leynist ennþá innst í hugarfylgsnum hans og ber að sjálfsögðu að fagna því. Þar tætir hann í sig rök þeirra sem vilja troða umferðar-"öryggi" upp á borgarana á kostnað frelsisins og lætur hvergi bilbug á sér sjá.

Varðhundarnir telja sig ekki þurfa að bæta miklu við orð formannsins. Það er algjör firra að einstaklingur sem kýs að neyta amfetamíns njóti ekki sömu meðferðar í umferðinni og þeir sem kjósa til dæmis að neyta Snickers-súkkulaðis eða Maxi-poppkorns. Þetta er fyrst og fremst sorgleg birtingarmynd alræðisþjóðfélagsins, sem lætur sér náttúruleg réttindi einstaklingsins í léttu rúmi liggja.

Að því sögðu lýsa varðhundarnir þó áhyggjum af því að formaðurinn lesi (og vísi meira að segja í!) kreddufullar bækur hins ný-Keynsíska hagfræðings Gregory Mankiw, sem kenndar eru í ríkisháskólum víðs vegar um heiminn. Lestur slíkra bóka er síður en svo til að stæra sig af (og gæti reyndar verið ástæðan fyrir daðri formannsins við sósíalismann).

Ungur ökumaður ók undir áhrifum amfetamíns á Selfossi í nótt

Löngu tímabært þing - stórfengleg afurð frelsisins!

Enn vinnur kapítalisminn glæsta sigra!

Varðhundar frelsisins taka því fagnandi að stúlkur skuli taka sig saman og framleiða klámefni handa okkur karlmönnunum. Það er einfaldlega þeirra val! Kjósi þær að framleiða klámefni, selja líkama sinn eða leggja land undir fót í mansali og kynlífstúrisma er það ekki á ábyrgð neinna annarra en þeirra sjálfra. Þetta er þeirra fyrsti valkostur til atvinnu. Mundu ungar stúlkur ekki taka því fagnandi ef hingað til lands mættu stæltir folar sem létu vel að hvor öðrum þeim til afþreyingar?

Allt er falt í heimi frelsisins!

Varðhundar frelsisins geta ekki annað en gelt af ánægju yfir þessum hvalreka á Íslandsstrendur. Alltof lengi hafa forpúkaðar rauðsokkur kúgað land og lýð með yfirgengilegum skoðunum sínum um  "kvenfrelsi" og hlutverk kvenna í nútímasamfélagi, að ógleymdu hvimleiðu súluofnæmi þeirra. Þessar greyið konur eru náttúrulega gjörsamlega GALNAR! Hvernig getur kvenfrelsi eiginlega falist í því að standa gegn framþróun þessarar elstu atvinnugreinar veraldarsögunnar, sem konur hafa svo lystilega lagt fyrir sig og náð fullkomnum tökum á? Það er varðhundunum í það minnsta hulin ráðgáta hvernig sósíalískt bann við iðjunni auki veg kvenna - miklu fremur má búast við því að bannið myndi skerða tekjur kynsins svo um munar og hamla þannig hagvexti austur-evrópskra þjóða.

Að öðrum kosti vilja varðhundarnir ítreka ánægju sína yfir þessari viðbót við flóru íslensks atvinnulífs og fagna því aukna frjálsræði sem ríkisstjórn Geirs H. Haarde hefur staðið fyrir á undanförnum árum í atvinnumálum. Er hér um að ræða afar skapandi og frjóa atvinnugrein sem mun vafalaust dafna vel og lengi á frjálsum markaði. Húrra fyrir Haarde!

Klámþing verður haldið hér á landi í næsta mánuði

Takk Sjálfstæðisflokkur... NOT!

Fullir voru Varðhundar frelsisins bjartsýni í vor. Loksins var R-lista báknið frá, dautt og grafið með tali sínu um „launamun kynjanna“ og „almenningssamgöngur“.

En skjótt skipast veður í lofti. Fyrr er varði var Sósíal-Villi farinn að spreða pening hægri vinstri (aðallega vinstri) eins og hann ætti hann sjálfur. Aðeins einstaklingar mega spreða! Stjórnvöld eiga að virða okkar óskir, ekki kúga okkur með meirihlutavaldinu.

Þessi skák-kommúna er bara enn eitt skrefið í átt að ráðstjórninni. Sovét-Ísland - burt með þig!

Ekki er öll vitleysan eins. 

Skákakademía Reykjavíkur stofnuð

Kaupum Beckham!

Varðhundar frelsisins eru miklir aðdáendur hinnar eðlu listar, knattspyrnunnar. Fátt er skemmtilegra en að sjá tvö góð knattspyrnulið keppa á hinum frjálsa markaði. Leikmenn ganga kaupum og sölum og liðin sjálf einnig og keppast þau þannig öll um að verða þau bestu. Liðin sem verða undir í samkeppninni falla niður um deild. Svona á það að vera.

Hins vegar eru landslið rammsósíalísk batterí sem ótrúlegt er að séu enn til staðar nú á tímum hnattvæðingarinnar. Landsmenn allir eru neyddir til að borga skattpening í einhvers konar sameignarlið, sem getur svo ekki einu sinni keypt og selt leikmenn á frjálsum markaði!

Væru landslið rekin eins og fyrirtæki væri Beckham í íslenska landsliðinu, spilandi við hliðina á Eið Smára og Stefáni Gíslasyni. Hver mundi ekki vilja það?

Beckham aftur í enska landsliðið?

Hin misskildu "menningarverðmæti"

Nú er fyrirhugað er að reisa hús fyrir milljarð íslenskra króna utan um nýja stofnun Árna Magnússonar, enn eitt ríkisbáknið sem hefur þann eina tilgang að sólunda í tóma vitleysu þeim fjármunum sem stolið hefur verið af heiðarlegum íbúum þessa lands í formi skatta. Innan veggja þessarar stofnunar munu reika um skítugir aflóga fræðimenn sem komast af með því að mergsjúga skattspenann (þótt spenar hafi raunar engan merg, en það er annað mál) og hafa þann eina tilgang að stunda óarðbærar „rannsóknir“ á svokölluðum „menningarverðmætum“ og reyna að hindra frjálsa markaðsvæðingu með því að „viðhalda þjóðernisvitund og íslenskri tungu“. Hafa lesendur áður kynnst slíkri afturhaldssemi? Það hafa Varðhundar frelsisins ekki.

Hvenær ætlar fólk að átta sig á því sem Varðhundar frelsisins hafa talað fyrir svo óralengi; að svonefnd „menningarverðmæti“ eru ekki verðmæti nema einhver sé tilbúinn að borga fyrir að njóta þeirra? Í Árnastofnun eru mörg hinna „verðmætu“ handrita meira að segja geymd bak við luktar dyr þannig að enginn getur fengið að sjá þau, hvað þá meira! Auðvitað væri best að einkavæða stofnanir sem þessar, eins og allar stofnanir. Leyfa útsjónarsömum einstaklingum með viðskiptavit að efla íslenskt þjóðarbú með því að selja aðgang að Konungsbók Eddukvæða og öllum hinum rykföllnu skruddunum. Jafnvel væri hægt að selja einhver þeirra til atorkusamra viðskiptajöfra ef rétt verð byðist. Þeim munum sem fólk væri ekki tilbúið að greiða fúlgur fyrir að berja augum væri svo að sjálfsögðu réttast að fleygja. En ekki hvað?

Það sama gildir um Þjóðminjasafnið. Þar er aldrei nokkur maður nema stöku túristi á miðvikudögum, þegar aðgangur er ókeypis. Bendir það ekki til þess að þær svokölluðu „þjóðargersemar“ sem þar eru til sýnis séu alls ekki verðmætar, heldur einmitt þvert á móti algjörlega verðlausar? Ef skynsamur einkaaðili ætti safnið myndi hann annað hvort finna leið til að græða á því eða selja munina hæstbjóðendum og loka sjoppunni. Tilgangur þess að reka eitthvað án arðs er Varðhundum frelsisins algerlega hulinn og það er hrein og bein móðgun við réttsýna launþega að lifibrauði þeirra sé varið í slíka gagnsleysu.